Körpənin yuxu rejimi necə olmalıdır? Yetkinlərdə olduğu kimi körpələrdə də yuxu – gün ərzində beynin qəbul etdiyi bütün məlumatları emal etmək üçün əla bir yoldur. Yuxuya ehtiyacı yaşdan asılıdır.
Yeni doğulmuş körpələr gündə təxminən 20 saat, 2-4 yaşlı uşaqlar təxminən 16 saat, 4-5 yaşlı uşaqlar 13 saat, 6-7 yaşlı uşaqlar 12 saat, yeniyetmələr isə 9 saat yuxuya ehtiyac duyurlar.
Burada qeyd etmək lazımdır ki, bütün uşaqlar əlbəttə ki, fərdidir və bu orta parametrlərə mütləq uyğun gəlməyəcəkdir. Uşağınızın əlavə bir saat yatacağından qorxaraq, çox zərurət olmadıqda oyatmağa dəyməz. Ancaq unutmaq olmaz ki, yuxu rejiminə riayət etmək uşağın fiziki və psixoloji inkişafına faydalı təsir göstərir. Uşaqlarda yuxu inkişafda xüsusi rol oynayır. Birincisi, yuxu böyümə prosesində iştirak edir. Uşağın böyümə hormonunun demək olar ki, 80 faizi ilk yuxu dövründə istehsal olunur. Yuxunun olmaması uşaqda böyümənin geriləməsinə və fiziki inkişafın ləngiməsinə səbəb ola bilər. Alimlərin fikrincə, balanssızlıq, təlaş, unutqanlıq, nitqdə çaşqınlıq və şıltaqlıq çox vaxt uşağın kifayət qədər yuxu almadığını göstərir. Bunu gözləri toz basmış kimi ovuşdurmaq vərdişi də sübut edir.
Yuxu şərait tələb edir. Bəzi valideynlər uşağın televizorun və ya söhbətin səsi ilə yuxuya getməsinin səhv bir şey olmadığına inanırlar. Amma bu, kifayət qədər ciddi yanlış fikirdir. Xüsusi elektroensefaloqrafik tədqiqatlar göstərdi ki, belə bir mühitdə körpə dayaz yuxuya gedir və nəticədə sinir sistemi lazımi istirahəti almır.
Erkən dövrdən körpənizi eyni vaxtda yatağa qoyun. Yuxuya getmək üçün bir ritual hazırlayın – üz yuma, diş fırçalama, kitab oxumaq və çalışın bu ritualı heç vaxt dəyişməyin. Yatmazdan bir neçə saat əvvəl uşaq səs-küylü oyunları bitirməli, ev tapşırıqlarını yerinə yetirməli və kompüteri söndürməlidir. Sakit oxumaq və ya oyuncaqlarla sakit oyun ona sakitləşməyə və tez yuxuya getməyə kömək edəcək. Körpənin yataq otağı sərin, qaranlıq və sakit olmalıdır ki, heç bir şey dinc yuxuya getməyə mane olmasın.
Yuxu rejimi uşağın normal böyüməsi və beyin inkişafı üçün çox vacibdir və müntəzəm yuxu olmaması ciddi xəstəliklərə səbəb ola bilər. Körpənin yuxuya getməsi üçün şərait yaradın və heç bir şeyin onun tam yuxusuna mane olmamasına diqqət yetirin.
